مسلسل علمى – الحلقة الأولى: اللمبة على التوالى

مسلسل علمى للأطفال على شكل حلقات منفصلة من تأليف: أ. محمد خليل

داخل قاعة أفراح بمنطقة شعبية كنت أجلس وحولي مجموعة من الأطفال وكعادتي يجب أن يكون حواري معهم عن الفيزياء لذا أمسكت بكوب ماء ووضعت ورقة كراسة عليه ثم قلبت الكوب وسألت الأطفال:

• هيحصل أيه لو سبت الورقة.. المية هتوقع؟

ثم تركت الورقة ولم تسقط لأن الضغط الجوي ثبتها على الكوب ولمعت أعين الأطفال حولي وجعلت أحدهم يمسك الكوب بنفسه ثم كرر بعضهم التجربة بين الضحك والصراخ والمناداة لأصحابهم ليشاهدوا التجربة الخطيرة

انتبهت إلى وليد صديقي وصاحب دعوة الفرح وهو يقول:

يا أستاذ أرحمني مش على طول فيزياء

فكري:

معلش طبع بقى وكمان العيال مبسوطة

عبد الحميد .. أحد الجالسين وقد انتبه للتجربة:

سيادتك أستاذ علوم؟

فكري:

فيزياء تحديدا بجامعة القاهرة.

عبد الحميد:

بس الفيزياء دي يعنى أيه بالضبط؟

فكري:

سيادتك الفيزياء كل حاجة الضوء والسما والحركة

عبد الحميد:

لا مش قصدي أنا أفهم أني لما بطني توجعني أروح لدكتور باطنة ولو سناني يبقى دكتور سنان

فكري:

وجع الفيزياء في الدماغ والعياذ بالله….

وليد:

عشان كده الدماغ بايزة

عبد الحميد:

لا صحيح من غير هزار يعنى أنت عامل حركة بكوباية مية وورقة كراسة… في حركات تانية؟

فكري:

كثييير.. تجارب العلوم في المنزل كثير.

فكري ينظر إلى اللمبات الكهربائية المعلقة بالفرح

شايف سيادتك اللمبات دي فيزياء درس التوصيل على التوازي والتوصيل على التوالي.. طبعا اللمبات دي لازم تكون متوصلة على التوازي عشان لاقدر الله لو لمبة اتحرقت الباقي يفضل منور

يتدخل طفل صغير وهو ينادي أستاذ فكري

مش فاهم يا أستاذ فكري يعنى لو على  التوالى لو لمبة انحرقت يطفى باقى اللمبات؟

فكري:

بالضبط بس طبعا في الأفراح بتكون اللمبات على التوازي

الطفل يمسك بحجر ويكسر أحد اللمبات فيعم الظلام المكان كله

عبد الحميد:

أستاذ فكري هو كده اللمبات…

فكري:

أيوه بالضبط.. الكهربائي غلط ووصلها على التوالي.. هيا دي الفيزياء

صورة توضيحية لطريقة التوصيل على التوالى و التوصيل على التوازى:

أضف تعليق

عدد التعليقات