لعبة حفظ الكلمات

موضوعنا النهارده إن شاء الله يفيد الامهات اللى بتلاقى صعوبه فى الحفظ لدى ابناءهم وتساعد اطفالهم كمان على زياده التركيز ,هى عباره عن لعبه بسيطه هنعملها بايدينا.

الادوات المطلوبه

•  ورق كانسون
•  كاتر (قطر)
•  مسطره وقلم
•  ورق فوم

 اولا هنجيب ورقتين كانسون هنقصهم تقريبا  الابيض 20*20 والروز 21 *10.5

 وهنتنى الورقه البيضا بالنص وبعدين نرسم المربعات (الشبابيك) ال هنفتحها بعد كده بالقطر) عملت مقاس المربع 2.5 *2.5 ومسافه بين المربعين5. سم بس طبعا المقاسات ممكن تغيرها زى ما تحبى)

المربعات بنرسمها من الناحيه المتنيه والناحيه المفتوحه بتبقا من فوق بتاعت المربع الكنسون وفتحنا المربعات بالقطر وبعد كده لزقنا الورقه الروز

بعد ما لصقنها وفتحنا الشبابيك بالقطر او المقص من كل الجهات ما عدا جهه واحدة

غلفت الورق الكانسون الابيض بالصق الشفاف من الظهر عشان متظهرش عشان يديها صلابه مع اللعب متبوظش بسرعه

وبعدين لصقنا الدبل فيس السميك بردو من الظهرعشان نعمل الممرات ال هندخل فيها الكروت

 هنلصق الحروف الانجليزى بعد ما طبعنها هنحط طبقه من صمغ الورق ال صنعناه قبل كده بنفسنا على ظهر الفوم والورق المطبوع كمان على الظهر مش الوش ليه ؟ عشان بعد القص متلاقيش  الحروف معكوسه

 

 

 

 وبعد ما قصينا الحروف كلها لصقنها على شريط الكرتون ال قطعنها لصقنها باللصق الدبل فيس الورق  (مش الطخين) طب ليه لزقنا المربع الكنسون باللصق الدبل فيس التخين ؟؟ عشان يعملى مسافه بسيطه بين الورقتين من خلالها أقدر أدخل كروت الحروف فيها

 

  أخر حاجه التزيين, عملنا نقط عليها وبنتى عايزه تلصق البومه عليها فلصقنا البومه يعنى سيبى موضوع التزيين ده للطفل ولو حتى حب انه يحط استكرات عليها تمام او حتى يرسم عليها اى رسمه.

 نيجى بقا  لأهم حاجه وهى:

 التطبيق

 هنعرض للطفل كلمه فى الكتاب بتاع اللغه الخاص به ونقوله بص عليها كويس قوى عشان هسألك سؤال وبعدين تخبى الكلمه وتقوليله تعرف تقولى حروفها كانت ايه ؟طبعا ممكن اول مره ميعرفش كررى تانى فى المره التانيه هيركز اكتر ويجبلك منها مثلا حرفين او ممكن يجبها كلها وهكذا وبعدين تقوليله طيب تعرف تفتكر حروفها وتطلعها من الحروف دى أقصد( الحروف الفوم) هيبدأ يطلع ويرص فى الشبابيك تمام كده.

 هتقفلى الشباك على حرف واحد من حروف الكلمه ال هو رص حروفها وتقوليله تعرف تقولى الحرف المستخبى ايه؟ هيقولك كذا لو صح صقفه كبيره وتشجيع لو غلط هتقوليله مثلا حاول تانى.

 تانى مره هيبص كويس ع الكلمه وبعدين تقفلى شباك وتقوليله الحرف ايه هتلاقيه تدريجيا بدأ يركز ويعرف وهتلاحظى ان شاء الله تطور ملحوظ فى حفظه للكلمات.

ملحوظه بسيطه

دى لعبه مبنيه من البدايه للعب مش للنرفزه هزرى واضحكى مع طفلك وقت حفظ الكلمات والمذاكره هتلاقى نتائج افضل بكتير من الزعيق والنرفزه وهتلاقيه هو بنفسه ال جيبلك اللعبه وبيقولك يلا نلعب بيها لانها خلاص ارتبطت فى ذهنه وقت اللعبه دى هو وقت الهزار والضحك مع ماما.

 

أضف تعليق

عدد التعليقات