Atfal Club تعليم الطفل باللعب و الأنشطة
النهارده ان شاء الله نشاطنا مرتبط بنشاط المروحه الورق اللى نزلناه قبل كده “علم طفلك يصنع مروحة ورقية“
هنعلم الطفل يعمل طائره هليكوبتر يلعب بيها من اعاده تدوير (إعادة إستخدام) بعض المهملات فى المنزل.
الأدوات المطلوبه
- زجاجه بلاستيك
- كره بلاستيك
- شفاطة العصير
- الوان اكليريك (ملحوظه: انا استخدمت بويات الاكيه لانها كنت متوفره عندى فى الوقت ده)
- مسدس شمع
طريقة العمل:
نبدا اول حاجه هنجيب الزجاجة البلاستيك ونشيل الغلاف بتاعها وبعدين هنحط علامه بالقلم زى الصوره عشان نقص جسم الطائره والعلامه التانيه بردو القطعه اللى هنقصها عشان نعمل قاعدة الطائرة اللى هنلصق فيها الرجل بتاعت الطائره كده.
ونخرم الغطا عشان نعمل ذيل الطائره.
وبعدين اخدت نص الكوره البلاستيك ال عندى لانها كانت بتتفتح نصين فاستعملت نص واحد لكن ممكن تستعملى كوره صغيره بينج بنج او اى كوره بلاستك عندك تتناسب مع حجم الزجاجة.
هنا ركبنا المروحه الورق اللى شرحنها فى موضوع سابق وهنا عايزه حابه اوضح حاجه لو عرفتى تخلى الطفل يفتكر خطوات المروحه وهو اللى ينفذها ياريت عشان تضمنى انه مينساش هى اتعملت ازاى لان احنا مش عايزين نعمل نشاط فى وقتها يتنسى بعد كده عايزين نزود خبراته ونساعده على الاحتفاظ بالخبرات دى حتى لو كنت بسيطه هنا خرمنا خرم فى الازازه البلاستك وركبنا المروحه.
وبعدين لزقنا الكوره بمسدس الشمع فى الزجاجة والقطعه البلاستك اللى قصناها لزقنا فيها الشفاطات أما ذيل الطائره لزقناه فى الغطا بتاعت الزجاجة.
اخر مرحله التلوين ودى الطفل هو اللى بيلونها بنفسه واحنا بس بنساعده, يُفضل توخى الحذر (على حسب عمر طفلك) أثناء إجراء الخطوات السابقة, عشان فى مسدس شمع وتقطيع بلاستيك بسكينه او قطر, فلو كان عمر طفلك صغير فالأفضل أن تقوم الأم بالخطوات الأولى, المهم هو وجود الطفل معكى متابع للخطوات.
القاعده الفلين اختيارى بتقطعى مربع وتلوينه وتلصقى عليه الطائره.
الغرض منه انه هيساعد الطفل انه يمسك الطائره بسهوله وممكن تعملى حرف ال P عشان يعرف ان P is for Plane وترتبط فى ذهنه وتبقى لعبه وفيها كمان شىء تعليمى بسيط.
ودى والمروحه بتلف
أتمنى الموضوع يكون نال إعجابكم إن شاء الله
